Akademîyanê Wesarî de dersî bi tirkî, akademîyanê payizî de zî bi kurdî diyenê. Bi wasitaya yew programê diziwanî warê îlmê sosyalî de xebatanê kurdî de zanayişo ke tirkî de ameyo meydan ra îstîfade bibo. Afernayişo akademîk yê kurdî ke bi zehmet û kedêka pîle yeno meydan zî firsendê kemilîyayişî û neqil beno.

 

Serranê peyînan de unîversîteyanê Tirkîya de ziwan, kultur, dîn û nasnameyê kurdan ser o cigêrayiş, qiseykerdiş û perwerde zehmetêr biyo. Akademîya Wesarî wazena enê zehmetîyan sivik bikero û akademsîyenê ke enê warî de xebitîyenê û cigêrayoxê ke eleqe nîşanê enê warî danê, seba ke wendekaranê lîsansî û lîsansê berzî dir bêrê yew ca ameya tesawurkerdiş.

 

Akademî bi hawayê semînerê ke 8 hewteyî dewam kenê amade biya. Akademîya Wesarî ke bînaya WÎB ya Îstanbulî de tertîb bena her serre 30 hebî wendekaranê lîsansî û lîsansê berzî gêna. Ziwanê programî tirkî yo. Beşdarê ke bi serkewtiş akademî temam bikerê, peynîya programî de sertîfîkaya beşdarîye yena dayiş.

 

Dades serranê peyînan de unîversîteyanê Tirkîya de, netîceyê abiyayişê beş û enstîtuyê ke perwerdeyê lîsansê berzî û doktora danê Kurdî (kirdkî û kurmancî) de yew lîteraturo akademîk o muhîm ameyo meydan. Akademîya Payizî wazena eno lîteraturo akademîk o kurdî û afernayişê ci hîna baş biasîyo û bêro zanayiş û neqlê neslê ciwanî bibo. Semînerê kurdî (kurmancî û kirdkî û aver de belkî soranî zî) do 8 hewteyî dewam bikerê, Akademî her serre aşma teşrînê verînî (ekim) de dest pê kena.

 

Akademîya Payizî ke bînaya WÎB ya Îstanbulî de tertîb bena her serre 30 hebî wendekaranê lîsansî û lîsansê berzî gêna. Beşdarê ke do semedê programî qebûl bibê gereka dereceyêko baş de wendiş û nuştişê kurdî bizanê. Beşdarê ke bi serkewtiş akademî temam bikerê, peynîya programî de sertîfîkaya beşdarî yena dayiş.