Rayıro Ke Şıno Weqıfe

Weqfa ma verê verkan semedê caardişê amancê nuştekî ke senedê ronayişî de nusîyayo ronîyaya. Eynî wext de, seba mamostayê ma birêz Dr. Îsmaîl Beşîkcî ke cuya xwu weqfê afernayişê fikir û tehlîlanê derheqê kurdan û meseleya kurdan de kerdo rê yew deynê wefakarî ya.

Wexto ke serranê 1960yan de vatişê çekuya “Kurd” sey tabû bi de, mamosta Îsmaîl Beşîkçî hema emrê 20 serran de Unîversîteya Atatürkî ya Erzeromî de yew akademîsyeno ciwan bi ke reya verîne rastê kurdan ame, -bi vatişê ey “Kurdî ginayî zêhnê ey ro”-, ê rojan ra hetanî ewro Îsmaîl Beşîkcî derheqê kurdan de xebatanê xwu yê cesûran ra, duristîya xebata îlmî û akademîkî ra, bêterefî ra, mesûlîyetê roşinbîrîye ra caran tawîz nêdayo û xebata xwu tim dewam kerda. Mamosta Beşîkcî enê sedemî ra rastê bêhûmar tehqîqatan û cezaya zindanî ameyo, 17 serrê emrê xwu zindanan de viyarnayî.

Bereksê akademîsyen û cigêrayoxanê nîsbetê ke îdeolojîyê resmî destûr dano fikirîyenê û nusnenê, rastîya welatê xwu nêvînenê, tew ser de rastîyan tehrîf kenê, mamosta Îsmaîl Beşîkçî bi azadîya akademîkî û bêtereftîya xwu, bi bapesteyê exlaq û metodê îlmî biyo rîsipîtîya cîhanê akademîkî û roşinbîran. Bi xebate û helwêsta xwu ya bi rûmete neke tenya fikrê kurdan roşin kerd, belkî yê zaf kesan roşin kerd, îlham û cesaret da zaf kesan û hurmetê înan kesb kerd.

Weqfa ma nîşaneyê hurmetê seba Mamosta Îsmaîlî ya.

Hîkayeya rayirê ke şino Weqife zî ena ya; Îsmaîl Beşîkcî arşîvêk ke tede qasê şeştî serrî nizdîyê 20 hezar kitabî, qasê 3 hezarî kovar û rojnameyî bibî arêdabi la vera-vera kêmîyayne yan zî biyêne vindî. Mamosta Beşîkcî ena rewşe hevalanê xwu yê dorê xwu ra vatêne û endîşeyê xwu îfade kerdêne. Reya verîne ÎBrahîm Gürbüzî fikir kerd ke rayiro tewr baş yê pawitişê enê arşîvî ronayişê yew weqife yo, dima eno fikrê xwu Ruşen Arslan, Îsaq Tepe, Talat İnanç ve Abdullah Baranî rê akerd, înan zî eno fikir destek kerd. Dima Îbrahîm Gürbüzî milkîyetê di qatê bînaya ke semtê Beyoğlu yê Îstanbulî de nika merkezê weqife yo bexş kerd û heqê bikarardişê di qatanê bînan zî da, bi eno qeyde fikrê ronayişê weqife ame wucûd.

Qerarê ronayişê weqife nusxaya roja 27.11.2011 yê Rojnameyê Resmî de weşanîya la akerdişê fiîlî roja biyayişê Mamosta Îsmaîlî 07.01.2012 de bi beşdarîya dostan û hogiran bi yew merasîm bi.

Serekê rûmetî yê weqfa ma Îsmaîl Beşîkcî yo. Heyetê Mutewelîyan de zî Îsmaîl Beşîkcî, Îbrahîm Gürbüz, Îsak Tepe, Talat İnanç ve Abdullah Baran ê.