Ji Serokê İBVê İbrahim Gürbüz der barê mamoste Beşikci de daxuyanî
Dostên hêja,
Ez dixwazim xeberek xweş bi we re parve bikim. Mamosye Îsmaîl...

Navenda Çand û Hunerê ya Îbrahîm Gurbuz
Xebata Îbrahîm Gurbuz a avakirina saziyên çand, huner û ramanê di sala 1991ê de bi damezrandina Navenda Çanda Mezopotamyayê dest pê kir. Di sala 1992an de ev xebat bi damezrandina Enstîtuya Kurdî ya Stenbolê berdewam kir. Di sala 2004an de wî Radyo Yaşam damezrand û bi weşanên radyoyê qada xebatên xwe yên çandî berfireh kir. Di sala 2012an de, wî bi Îsmaîl Beşîkcî re pêşengiya damezrandina Weqfa Îsmaîl Beşîkcî kir. Bi damezrandina weqfê, di xebata wî de qonaxeke nû dest pê kir. Îbrahîm Gurbuz di nav damezrînerên van saziyan de bû û di birêvebirina karên damezrandina wan de roleke sereke girt ser xwe.
Heta niha heft berhemên Îbrahîm Gurbuz bi zimanên cuda hatine weşandin. Wî li hemû saziyên ku lê xebitî, ji bo parastina ziman, çand, huner, dîrok û bîra hevpar a neteweya Kurd ked da. Li Weqfa Îsmaîl Beşîkcî jî ji bo pêşxistina lêkolînên Kurdî, zindî ragirtina mîrata zanistî ya Îsmaîl Beşîkcî, azadiya derbirîna ramana rexneyî û parastina azadiya akademîk xebitî.
Navenda Çand û Hunerê ya Îbrahîm Gurbuz bi biryara Desteya Rêvebir a Weqfa Îsmaîl Beşîkcî, di çarçoveya weqfê de hat damezrandin. Armanca navendê ew e ku ezmûna çandî, xebat û têkoşîna Îbrahîm Gurbuz a bi salan bijî û bigihîje nifşên nû. Navend her wiha dixwaze beşdarî pêşveçûna azad a çand û hunera Kurdî bibe û ramana rexneyî, azadiya derbirînê û pirrengiya çandî xurt bike.
Şano û muzîka klasîk a Kurdî du qadên sereke yên xebata navenda me ne. Navend di warên zimanê Kurdî, wêjeya Kurdî û mîrata çandî de jî dixebite.
Qadên Xebata Me
Ji bo pêşxistina şanoya Kurdî, navend di warên nivîsandina lîstikên şanoyê, lîstikvanî, derhênerî û sahnekirinê de perwerde û atolyeyan pêk tîne û lîstikên şanoyê pêşkêş dike. Navend piştgiriyê dide nivîsandin û sahnekirina lîstikên bi Kurdî û alîkar dibe ku ev lîstik bigihîjin temaşevanên zêdetir. Her wiha ji bo perwerdekirina şanogerên ciwan û afirandina berhemên orîjînal derfet peyda dike. Kemal Orgun rêveberê Çardem Şano ye, ku di çarçoveya navendê de hat damezrandin. Ew di heman demê de rêveberê Beşa Hunerê ya navendê ye.
Navend dixwaze muzîka klasîk a Kurdî bi taybetmendiyên xwe yên resen bê parastin, li ser wê lêkolîn bê kirin, bê icrakirin û bigihîje nifşên ciwan. Ji bo berhevkirin û arşîvkirina berhemên kevneşopî pêşengiyê dike. Her wiha piştgiriyê dide ku ev berhem bi awayên nû bên icrakirin û taybetmendiyên wan ên resen bên parastin. Navend piştgiriyê dide hunermend û muzîkjenên ciwan ên ku di vê qadê de dixebitin û beşdarî perwerdekirina icrakerên nû dibe. Xebatên muzîka klasîk a Kurdî bi rêveberiya Sebahattin Xoce li Navenda Çand û Hunerê ya Îbrahîm Gurbuz, di çarçoveya Şaxa Amedê ya Weqfa Îsmaîl Beşîkcî de, tên meşandin.
Ji bo navenda me, şano û muzîka klasîk a Kurdî di parastina ziman, bîra dîrokî û nasnameya çandî ya neteweya Kurd de roleke sereke dilîzin. Bi çand û hunerê netewe dikare xwe nas bike, bîra xwe biparêze û pêşeroja xwe bi azadî ava bike.
Navend konferans, panel, axaftin, konser, lîstikên şanoyê, pêşangeh, pêşandanên fîlman û atolyeyên perwerdeyê li dar dixe. Piştgiriyê dide parastin û arşîvkirina çavkaniyên nivîskî, dîtbarî û devkî yên çanda Kurdî, da ku ew bigihîjin nifşên bê. Her wiha beşdarî perwerdekirina hunermend û kedkarên çandê yên ciwan dibe û afirandina berhemên hunerî yên orîjînal teşwîq dike.
Navend alîkar dibe ku hunermend, muzîkjen, şanoger, nivîskar, lêkolîner û saziyên çandî yên li parçeyên cuda yên Kurdistanê û li diasporayê bi hev re têkilî daynin û torên hevgirtinê ava bikin.
Vîzyona Me
- Beşdarî avakirina pêşerojekê bibin ku tê de ziman, çand, huner û bîra dîrokî ya neteweya Kurd bi azadî pêş bikevin, mafên çandî bên garantîkirin û ramana zanistî û rexneyî bêyî zexta siyasî an îdeolojîk bê derbirîn.
- Bibin saziyeke çandî ya xurt û serbixwe ku mîrata çandî ya neteweya Kurd biparêze û bigihîne nifşên bê, piştgiriyê bide afirandina hunera hevdem û girîngiyeke taybet bide şano û muzîka klasîk a Kurdî.
- Ji ber rola çand û hunerê di parastina hebûna neteweyekê de, azadî, wekhevî, pirrengî û wekheviya zayendî biparêzin.
Mîsyona Me
- Li ser muzîka klasîk a Kurdî lêkolîn bikin, berhemên wê berhev bikin û arşîv bikin, û bi parastina taybetmendiyên wê yên resen bigihînin nifşên bê.
- Piştgiriyê bidin hunermendên ku di qada muzîka klasîk a Kurdî de dixebitin û beşdarî perwerdekirina icrakerên nû bibin.
- Ji bo pêşxistina şanoya Kurdî, di warên nivîsandina lîstikên şanoyê, lîstikvanî, derhênerî û sahnekirinê de perwerde û atolyeyan li dar bixin.
- Piştgiriyê bidin nivîsandin û sahnekirina lîstikên bi Kurdî û alîkar bibin ku ew bigihîjin temaşevanên zêdetir.
- Ji bo pêşxistina ziman, wêje û mîrata çandî ya Kurdî bixebitin.
- Berhemên nivîskî, dîtbarî û devkî yên çanda Kurdî berhev bikin, biparêzin, arşîv bikin û bigihînin nifşên bê.
- Beşdar bibin ku mîrata zanistî ya Îsmaîl Beşîkcî, nêrîna wî ya rexneyî û xebatên wî yên li ser pirsa Kurd bigihîjin nifşên nû.
- Derûdorên serbixwe ava bikin ku tê de xebatên çandî û hunerî bi azadî bên kirin.
- Azadiya derbirînê ya hunermend û kedkarên çandê biparêzin.
- Piştgiriyê bidin hunermendên ciwan, ji bo derketina jêhatîyên nû derfetan peyda bikin û afirandina berhemên hunerî yên orîjînal teşwîq bikin.
- Konferans, panel, axaftin, konser, lîstikên şanoyê, pêşangeh, pêşandanên fîlman û atolyeyên perwerdeyê li dar bixin.
- Di navbera hunermend, muzîkjen, şanoger, nivîskar, lêkolîner û saziyên çandî yên li parçeyên cuda yên Kurdistanê û li diasporayê de torên hevgirtinê ava bikin.
- Bîra dîrokî û çandî ya neteweya Kurd bidin nasîn.
- Li hember zirara ku polîtîkayên asîmîlasyonê û înkara çandî didin, ji bo parastina ziman, çand û hunera Kurdî bixebitin.
- Bi çand û hunerê ramana rexneyî xurt bikin û beşdarî pêşveçûna kesên azad û civakeke azad bibin.